По вчерашниот терористички напад во Брисел истрагата се чини доста брзо напредува. Федералниот обвинител Фредерик Ван Леу пред новинарите рано попладне даде повеќе детали.
Утринава беше уапсено едно лице за кое се тврдеше дека е еден од тројцата терористи по кои од вчера е распишана потерница. Но ова брзо беше демантирано а истражните судии се уште го испитуваат уапсениот.
Обвинителот рече дека двајца терористи се разнеле со експлозив на аеродромот. Едниот е Ибрахим Ел Бакрави а вториот не е се уште идентификуван. Во метрото, еден час подоцна, се разнел Калид Ел Бакрави брат на Ибрахим кој исто така е идентификуван. Во станот во кој вчера имаше претрес најдени се 15 килограми експолозив., 150 литри ацетон, детонатори, торба полна со клинци и друг материјал за правење бомби.
Двајцата браќа и се познати на полицијата како деликвенти и биле осудени за кражба и насилство.
Интересно е тоа што е најден, како што рече обвинителот, тестамент на Ибрахим во компјутер фрлен во канта за ѓубре. Тој напишал дека му се брза, дека не знае повеќе што да прави, дека полицијата го бара и дека, доколку одлага, ќе заврши, цитирам, «како него во ќелија».
Се претпоставува дека ова изразот, «како него во ќелија», се однесува на Салах Абдеслам, еден од терористите од Париз, кој беше уапсен во петокот во Брисел. Од ова истрагата дефинитивно е уверена дека бриселските напади се поврзани со париските. Оттука Франција и Белгија решија да работат рака под рака.
Се уште нема резултати од потрагата по лицето кое се наоѓало на аеродромот во друштво со камиказите. Но се знае дека тој човек, човекот облечен во светла јакна на сликата која беше објавена вчера, носел торба со експлозив кој експлодирал без да убие или рани некого. Истрагата се сомнева дека овој човек е терористот кој ги изработил бомбите за париските и бриселските напади.
Во вчерашниот претрес во еден бриселски кварт беше најдено големо количество експлозив. Терористите сакале овој експлозив да го земат со себе кога тргнале да вршат напади. Тие викнале такси и побарале да им се испрати комбе. Но такси службата по грешка пратила обична кола и во неа, за среќа, немало место за подготвениот експлозив.
Последните објавени податоци велат дека загинало 32 лица а 270 се ранети. Пред малку беше најдено уште едно тело на аеродромот. Според шефот на итната служба на една бриселска болница ова не е конечна бројка. За жал, рече тој, во вакви случаи околу 2 отсто од повредените починуваат во болница во деновите што следат.
Во меѓувреме, идентификувањето на жртвите оди полека поради силината на експлозиите а многу луѓе преку социјалните мрежи ги бараат своите блиски од кои од вчера немаат вести. Податоците велат дека жртвите, загинатите и повредените, доаѓаат од 40 различни земји. Брисел е космополитска престолнина каде секојдневно на улица има луѓе од сите краеви на светот.
Конечно, властите од населението бараат да биде многу внимателно. Нивото на тревога останува на највисоко четрвто ниво во целата земја што значи дека опасноста од напад е блиска и непосредна.