Здравстените работници денеска го одбележуваат Светскиот ден на здравјето (7 април). Но, за разлика од изминатите години, овојпат го дочекуваат на првата борбена линија на фронтот против невидливиот непријател наречен коронавирус или ковид-19 кој е планетарна закана број еден во моментот. Со нивната максимална посветеност и пожртвуваност, деноноќно се обидуваат да спасат што е можно повеќе човечки животи за што го добија епитетот „херои на нашето време“.
Честитки до нив стигнуваат од сите страни, од сите релевантни здравствени организации, институции, агенции, од граѓаните. И во сите има заедничка порака: „Ви благодариме што се грижите за нас, но грижете се и за вас. Чувајте се“.
Министерот за здравство Венко Филипче по повод Светскиот ден на здравјето упати честитка до сите здравствени работници во земјава кои ги нарече „столб на здравствениот систем“ и кои имаат клучна улога во давањето здравствена нега и грижа за здравјето во овие моменти на тешки предизвици и искушенија, но и во нормални околности.
„Исправени сме пред најголемиот светски здравствен предизвик, ја водиме битката на нашата генерација. Коронавирусот од корен го смени нашето секојдневие и ќе направи трајни промени во нашите животи. Во оваа битка вие сте хероите. Вашиот труд и пожртвуваност спасуваат животи и токму заради вас луѓето веруваат дека ќе бидат безбедни и здрави. Сега, здравството и здравствените работници се клучниот столб во државата. Знам дека во моментот носите огромен товар. Заморот полека сите нè стигнува, а нè чекаат уште тешки денови. Но, верувам дека секој од вас знае колку е важно да издржиме, да останеме посветени, концентрирани и да дадеме се од себе да им помогнеме на нашите сограѓани. Многу е важно да се грижите и за себе и за своето здравје. Вие сте први на удар на вирусот и мора да се штитите. Без исклучок, штитете се на работното место, но и надвор од него. Грижете се за себе, за да можете да и натаму да се грижите за пациентите“, се вели во честитката на Филипче.