Навистина ми претставува задоволство што денеска можам да најавам дека првата и најстара градинка во Струмица „Детска Радост“, објектот 2 го проширува капацитетот за прием на нови 57 деца. Со тоа, оваа градинка, досегашниот капацитет од 100 деца го зголемува на 157, рече министерката Тренчевска
Министерката за труд и социјална политика, Јованка Тренчевска заедно со градоначалникот на Општина Струмица, Костадин Костадинов, денеска ја посетија детската градинка „Детска Радост“, од оваа општина, која што го прошири капацитетот за дополнителни 57 деца, со доизградба на нов дел поврзан со постојниот објект.
„Навистина ми претставува задоволство што денеска можам да најавам дека првата и најстара градинка во Струмица „Детска Радост“, објектот 2 го проширува капацитетот за прием на нови 57 деца. Со тоа, оваа градинка, досегашниот капацитет од 100 деца го зголемува на 157,“ рече министерката Тренчевска.
Таа рече дека за изведувањето на градежните работи и опремување на градинката, Министерството од Буџетот има обезбедено средства во износ од 17 милиони денари како дел од Програмата за изградба, опремување и одржување на објекти за детска заштита за 2020 година. Со доградбата, градинката добива 4 нови простории, од кои две (2) јаслени занимални и две (2) занимални во кои ќе бидат сместени деца од 2-4 години.
Министерката Тренчевска информираше и дека во Општина Струмица во завршна фаза е и изградбата на нова детска градинка со капацитет за 307 деца која се гради согласно Проектот за подобрување на социјалните услуги, со поддршка на Светска Банка. Како и дека двете градинки заедно значително ќе го зголемат опфатот на нови деца. Тоа се над 360 деца на кои им се овозможува квалитетно предучилишно воспитание и образование.
Според градоначалникот на Општина Струмица, Костадинов, континуираните ангажмани за проширување на капацитетите на постојните градинки, како и изградбата на нови, значат премногу за општина Струмица и нејзините граѓани.
Тој изрази благодарност до Министерството за труд и социјална политика и министерката Тренчевска за заложбата и реализација на новиот објект-детска градинка и уверување дека, активностите ќе продолжат и во иднина, затоа што најмладите струмичани се врвен приоритет.
