Новак Ѓоковиќ успеа да влезе во друштвото на тенисери со 900. победи во кариерата и сега е рамо до рамо со, сè уште активните Роџер Федерер, Рафаел Надал, но и пензионираните Гилјермо Вилјас, Иван Лендл и Џими Конорс. Српскиот ас, потешко одошто се очекуваше, се проби до второто коло на Австралија опен кој започна ноќеска во Мелбурн. Можеби го имаше најтешкиот ривал од фаворитите, можеби се загреваше или, пак, можеби повторно се соочува со проблем, па загуби сет во триумфот на Јан Ленард Штруф од Германија, 37. на АТП ранг листата, со 7:6, 6:2, 2:6, 6:1.
Воведниот сет не навестуваше дека ќе се одиграат максимален број на гемови. Ѓоковиќ направи брејк што беше сигнал за присутните на трибините, но и ТВ аудиториумот за почеток на крајот на германскиот тенисер и негова експресна елиминација. Штруф, сепак, најде сили и се издигна во гемот во кој фаворизираниот противник сервираше за 1:0, успеа до рибрејк за тај-брејк, меѓутоа повеќе не можеше.
Вториот сет, Ѓоковиќ го освои на рутина за проблеми да се појават во третиот сет. Се случи пад во прецизноста на првиот сервис (погодени само 45 отсто) што не е доволно за триумф и над послабо рангиран играч од Штруф кој успеа да се врати на сет минус. Проблемите во играта на вториот носител, сепак, исчезнаа по паузата. Успешноста на сервисот се врати на посакуваното ниво и победата не беше доведена во прашање.
Пласман во второто коло без загубен сет обзбедија Роџер Федерер во дуелот со Американецот Џонсон (6:3, 6:2, 6:2) и Стефанос Циципас против Италијанецот Карузо (6:0, 6:2, 6:3).
Првата пречка на турнирот ја совлада и бранителката на титулата во женска конкуренција, Наоми Осака. Јапонката, која лани во финалето ја шокира Серена Вилијамс, ја порази чешката тенисери Мери Бузкова со 6:2, 6:4. Убедливи партии во првиот натпреварувачки ден во Мелбурн и на Петра Квитова која загуби само гем во мечот со сонародничката Синиакова (6:1, 6:0) и на Серена Вилијамс против Русинката Потапова (6:0, 6:3).
Австралија опен, 1 коло
МАЖИ
Ѓоковиќ (2., Србија) – Штруф (Германија) 7:6, 6:2, 2:6, 6:1
Федерер (3., Швајцарија) – Џонсон (САД) 6:3, 6:2, 6:2
Циципас (6., Грција) – Карузо (Италија) 6:0, 6:2, 6:3
Беретини (8., Италија) – Харис (Австралија) 6:3, 6:1, 6:3
Фусович (Унгарија) – Шаповалов (13., Канада) 6:3, 6:7, 6:1, 7:6
Димитров (18., Бугарија) – Лондеро (Аргентина) 4:6, 6:2, 6:0, 6:4
Пелја (22,. Аргентина) – Смит (Австралија) 6:3, 7:5, 6:4
Квери (САД) – Чориќ (25., Хрватска) 6:3, 6:4, 6:4
Еванс (30., В. Британија) – Мекдоналд (САД) 3:6, 4:6, 6:1, 6:2, 6:3
ЖЕНИ
Барти (1., Австралија) – Цуренко (Украина) 5:7, 6:1, 6:1
Осака (3., Јапонија) – Бузкова (Чешка) 6:2, 6:4
Квитова (7., Чешка) – Синиакова (Чешка) 6:1, 6:0
С. Вилијамс (8., САД) – Потапова (Русија) 6:0, 6:3
Мартиќ (13., Хрватска) – МекХејл (САД) 6:3, 6:0
Кенин (14., САД) – Тревисан (Италија) 6:2, 6:4
Жанг (Кина) – Стивенс (24., САД) 2:6, 7:5, 6:2
Александрова (25., Русија) – Тајхман (Швајцарија) 6:4, 4:6, 6:2
Кирстеа (Романија) – Стрицова (32., Чешка) 6:2, 7:6
Гоф (САД) – В. Вилијамс (САД) 7:6, 6:3
Возњацки (Данска) – Ан (САД) 6:1, 6:3