Професорката Гордана Силјановска е меѓу кандидатите за претседател што се пријавиле на огласот на ВМРО ДПМНЕ, потврдија високи партиски извори за НОВА.
На огласот се пријавиле вкупно 5 кандидати, но нашите извори велат дека најсериозни кандидати се Гордана Силјановска и Влатко Ѓорчев, а повеќе шанси даваат на Силјановска за која велат дека е извесно дека ќе освои мнозинство делегати на Конвенцијата на партијата закажана за 16 февруари во Струга.
Но, освен партиска поддршка, истиот партиски извор кој сака да остане анонимен за да не влијае на процесот, рече дека се размислува да се собираат и потписи за кандидатурата на Силјановска за да се „потврди поддршката која ја ужива меѓу граѓаните“, со што таа би била „граѓански кандидат подржан од ВМРО ДПМНЕ“ .
Силјановска имала најдобар резултат и на партиските анкети и имала најголема поддршка и кај членовите на ВМРО ДПМНЕ и кај членовите на СДСМ.
Членот на партиското раководство за НОВА изјави дека „не ни паѓа на памет“ да се бојкотираат претседателските избори, но додаде дека инститираат на фер гласање. Раководството е на став дека треба да се организираат и предвремени парламентарни избори што би значело и формирање на техничка влада, а со тоа би се обезбедиле и гаранции за фер натпревар. Од ВМРО ДПМНЕ додаваат дека се уште Обвинителството нема постапено по нивните пријави за „полнење на кутиите“ на референдумот и предупредуваат дека истото може да се случи доколку има само претседателски избори.