Високиот комесар на Обединетите нации за човекови права Зеид Раад ал Хусеин вчера го искритикува односот на Европската унија кон миграциската криза и ги обвини Европејците дека не се ангажираат за прашањето за мигрантите во Либија.
На 28 август неколку европски и африкански земји на Самитот во Париз усвоија патоказ за миграциската криза, но според Ал Хусеин патоказот не нуди конкретна програма за справување со хуманитарната криза во Либија.
Тој изјави дека мигрантите во Либија се соочуваат со мошне големи тешкотии. Некои од нив умираат од глад, болести и жед, други се измачувани и претепувани до смрт, додека работат како робови, а трети едноставно се убивани.
„Нашиот персонал документира силување жени, кои се задржани таму. Тие по цели денови таму се држат затворени од мажи, кои во текот на ноќта го организираат нивното силување. Состојбата на мигрантите кои ја минуваа Либија беше ужасна за времето на Гадафи, но оттогаш се претвори во пекол“, рече високиот комесар на ОН за човекови права.
Ал Хусеин предупреди дека враќањето на мигрантите во центрите за задржување, каде тие се објект на измачување, силување и други сериозни кршења на човековите права е сериозно нарушување на меѓународното право.