Нискобуџетната авиокомпанија „Визер“ објави дека ги суспендира летовите од Скопје и од Охрид кон Милано (MXP), Тревизо (TSF) и Бергамо (BGY) до 3 април поради опасноста од ширење на коронавирусот.

„Патниците кои направиле резервација во овој период ќе бидат автоматски известени и ќе бидат сместени на алтернативни рути во најскоро можно време. Сите оние кои имаат букирано директно на wizzair.com или на мобилната апликација на авиокомпанијата, ќе добијат известување на нивната електронска пошта, каде ќе им биде понудена бесплатна повторна резервација, целосен поврат на нивните средства или 120 проценти поврат на цената во кредити“, соопшти „Визер“.

Од авиокомпанијата наведуваат дека може да ги информираат само патниците кои нивната резервација ја направиле преку wizzair.com или на мобилната апликација на „Визер“. Патниците кои имаат резервирано преку туристички агенции, вклучувајќи ги онлајн туристичките агенции, треба да стапат во контакт со компанијата преку која ги купиле нивните билети.