Македонскиот јазик и македонскиот идентитет никогаш не биле и никогаш нема да дозволиме да бидат масата за преговори со било која страна, одговорија од Владата на наводите на претседателот на ВМРО-ДПМНЕ, Христијан Мицкоски дека биле координирани тајни преговори во кои било понудено Декларацијата од бугарскиот Парламент да стане дел од преговарачката рамка со Европската унија. Оттаму велат дека со македонскиот идентитет не смее и нема да си игра ниту оваа, ниту било која друга Влада.
„Овој наш став е јасно разбран и поддржан од пошироката меѓународна заедница како што впрочем е јавно соопштено и во ставовите на голем број европски лидери. Тоа го знае и Мицкоски, но тој, како и многу пати до сега, не пропушта прилика да му наштети на секој процес, не секоја иницијатива која отвора перспективи и решение. Исплашен од таа можност презема и вакви штетни постапки спротивно на сѐ што е во интерес на граѓаните и државата, вклучувајќи ја и оваа негова изјава преполна со неточни тврдења. Со обидот за гол популизам и манипулации со фактите, иако му се добро познати, уште еднаш станува јасно дека лидерот на опозицијата делува целосно деструктивно и се обидува да ги минира дипломатските процеси кои во најдобрите европски манири нудат решение низ дијалог“, велат од Владата за Пресс 24.
Претседателот на ВМРО ДПМНЕ, денеска на Фејсбук објави дека добил, како што напиша, алармантни информации од дипломатки извори дека специјалниот пратеник во Софија, Владо Бучквоски и премиерот Заев деновиве координирале тајни преговори каде се нуди Декларацијата усвоена во бугарскиот Парламент да стане дел од преговарачката рамка со ЕУ.
„Дел од документот на бугарското Собрание се оспорување на генезата и посебноста на македонскоит јазик, ревизија на историјата и периодот на нашата антифашистичка борба, како и присвојување на важни личности од македонската историја како бугарски и уште редица отстапки кои се погубни за Македонија“, напиша Мицкоски на Фејсбук и додаде дека на тој начин Македонија се става во позиција да преговара за македонскиот идентитет и јазик.
„Ако Заев го прифати ова, тоа значи дека нѐ става во позиција да го негираме македонскиот идентитет и да прифатиме дека како народ постоиме од 1945 година, што е небулоза и срам за сите нас и за нашите предци и поколенија. Не смееме да дозволиме овие двајца политички измамници да ја понижат жртвата на нашите предци и да ја загрозат иднината на нашите потомци“, пиша Мицкоски.
Дека за јазикот и идентитетот не се преговара, денеска потврди и премиерот Зоран Заев, коментирајќи го португалскиот нон пејпер, изјави дека за јазикот и иднетитетот не се преговара.
„Португалскиот предлог за нас е одлична појдовна основа за постигање на договор. Кога велиме за нашите страни ги знаете – македонскиот јазик и македонскиот народ и идентитет се нешто за кое што не сакаме документ да погледнеме, не предлог. И тоа им е јасно на сите. Впрочем кога разговараме и со соседите, со Бугарија зборуваме дека и тие ја прифаќаат реалноста на македонскиот народ и македонскиот јазик, но важно е како се формулираат самите ставови“, рече Заев во одговор на новинарски прашања по увидот во реконструираното одделение во Комплексот на Клиниката за торакална хирургија „Мајка Тереза“.