Владата на денешната седница го утврди Предлог-законот за финансиска поддршка за намалување на последиците предизвикани од корона вирусот врз производството на тутун.
Со законот се уредуваат условите, корисниците и цената, како и постапката за доделување финансиска поддршка за откупот на тутун од ланската реколта.
-Со оглед дека не се работи за обемен и сложен закон, согласно член 170 од Деловникот на Собранието на Република Северна Македонија, како и во интерес на производителите на тутун, Владата го достави предложениот текст на усвојување по скратена постапка, информираа од Владата.
Министерот за земјоделство, Арјанит Хоџа вчера информираше дека Предлог-текстот е во финална процедура, а целта на донесувањето на законот е да се исплатат ветените средства за поддршка на тутунарите. Според законот, за тутунарите се предвидени 307,5 милиони денари, средства со кои, покрај веќе исплатените субвенции, ќе се постигне, како што очекува министерот, просечна цена од над 180 денари за килограм тутун.