Владата да излезе јасно да каже за што се преговара со Бугарија, повикаа од ВМРО-ДПМНЕ.
Секретарот за меѓународна соработка на партијата, Стефан Андоновски во гостување на „Сител“ рече дека работните групи со Бугарија се однесуваат на се, освен на прашањата кои што Бугарија ја интересираат, а тоа се националните.
„Да влезете во работна група, да се договарате за фудбал, затоа што тоа беше еден од договорите потпишан на ниво на спортот и младите, нема никаква потреба. Државата ја водат институциите, нема потреба ВМРО-ДПМНЕ да коментира нешто во делот на заштита на животна средина, на летот Скопје – Софија, или за Агенција за млади и спорт за што потппишаа договори. Државата треба да ја водат институциите, а Владата е лицемерна затоа што не не вклучи во преговорите кои што се однесуваат на клучните политички прашања. Бугарија нема проблем со македонскиот фудбалски клуб Вардар, Бугарија има сериозен проблем со македонскиот јазик, македонскиот идентитет, самостојноста на македонскиот народ“, нагласи Андоновски.
Во однос на пописот, Андоновски уште еднаш го повтори ставот на партијата дека пописот е некомплетен, затоа што, како што рече, над 130.000 резидентни граѓани воопшто не се попишани и за нив ги нема одговорите на трите клучни прашања, националноста, мајчиниот јазик и етницитетот.