По интензивниот период на подготовки и формално одобрување, денеска го имаме задоволството да го означиме почетокот на 19 нови проекти, сите финансирани од ИПА инструментот на Европската Унија, рече министерот за локална самоуправа Горан Милевски за време на конференцијата „ЕУ за општините“.
– Осум нови проекти од Програмата „ЕУ за општините” и единаесет проекти од ИПА 2 Програмата за прекугранична соработка меѓу Северна Македонија и Албанија. Проектите, секој со просечна вредност од над 600.000 евра се однесуваат на подобрување на условите за заштита на животната средина, зголемување на мобилноста, подобрување на социјалните услуги, воведување на е-услуги во општините. Ова е можност во секоја од општините Велес, Радовиш, Тетово, Аеродром, Скопје, Врапчиште, Охрид и Струмица, каде што ќе се имплементираат овие проекти, да се направи разлика во подобрувањето на локалните услуги од што најмногу корист треба да имаат граѓаните, рече Милевски.
„ЕУ за општините“ е нова програма преку која општините ќе добијат вкупно 5,5 милиони евра за финансирање на 8-те одобрени проекти. Кофинансирањето го обезбеди Министерството за локална самоуправа со поддршка и на Швајцарската агенција за развој и соработка, со што се создадоа услови за полесен пристап на општините до средствата од Европската Унија.
Исто така денеска ќе бидат потпишани и договорите за кофинансирање на 11 проекти за прекугранична соработка со Албанија од вториот и третиот повик. Вкупната вредност за двете држави е 10,7 милиони евра грант од Европската Унија. Половина од овие средства, преку проекти, ќе се реализираат во нашата држава. Националното кофинансирање од 15 отсто за нашите проекти го обезбедува Министерството за локална самоуправа.
– Проектите се партнерски и ќе ги имплементираат општини, установи, граѓански организации со цел подобрување на условите за живеење во Охрид, Битола, Могила, Демир Хисар, Маврово и Ростуше, Крушево, Ресен, Струга, Врапчиште и Боговиње, откри министерот Милевски.