Либиската Влада на национално единство издаде потерница по генерал Калифа Хафтар и шестмина негови офицери, обвинувајќи го дека наредил смртоносни воздушни напади врз цивилно население.
Пред две недели Хафтар и неговите сили презедоа офанзива Триполи, каде е седиштето на меѓународно признаената либиска Влада предводена од Фајез ел Сараџ.
Светска здравствена организација соопшти дека во ескалацијата на судирите убиени се 205 луѓе, а над 25.000 цивили се раселени.
САД и Русија соопштија дека во моментот не можат да ја поддржат резолуцијата на Советот за безбедност на Обединети нации со која се апелира за прекин на огнот во Либија, тврдат неименувани дипломати.
Русија е против тоа што во британската нацрт-резолуција се обвинува генерал Калифа Хафтар за ескалација на насилството, поради напредувањето на неговата Либиска национална армија кон Триполи.
Од друга страна, САД не го образложија својот став за нацрт-резолуцијата, со која се бара од земјите кои имаат влијание врз завојуваните страни да обезбедат согласност за безусловен пристап на хуманитарната помош за Либија.
За усвојување на резолуцијата потребни се девет гласови и ниту една од петте постојани членки на СБ (САД, Велика Британија, Франција, Русија и Кина) не вложи вето.
По соборувањето на долгогодишниот лидер Муамер ел Гадафи во 2011 година Либија е нестабилна поради големиот број на вооружени групи кои се борат за власт и контрола над нафтените полиња.
Од летото 2014 година Либија е политички поделена на две влади – самопрогласената во источниот дел на земјата, со седиште во Тобрук што е под контрола на 75-годишниот Хафтар и меѓународно признаената Влада со седиште во Триполи со премиерот Сараџ.




