Владата не само што не чувствува одговорност поради кратењето на 27 милиони евра од ИПА фондовите од Европската комисија (ЕК) туку смета дека вината ја носи всушност опозицијата.
По изјавата на портпаролката на ЕК Маја Коцијанчич дека кратењето на помошта за Македонија за 2016 година, кои Македонија ги добива како неповратни средства за да ја забрза својата интеграција во ЕУ, изнесува 27 милиони евра, писмено реагираше и Владата.
Во изјавата од Владата стои дека овие кратења на фондови не се санкции туку намалување на доделените и испратени пари за Македонија:
„Не станува збор за санкции туку за намалување на програмските средства. Има два аспекти – внатрешен и надворешен. Внатрешниот е поврзан со фактот дека повеќе од една година лебдеше спроведувањето на избори. Во тој период институциите беа политички хендикепирани преку блокирачки механизми во неколку клучни министертства вклучително и министерството за финансии.
Најголемата опозициска партија своето учество во Владата не го искористи за зголемување на довербата во избирачкиот процес како што е предвидено со договорот. Сосем спротивно фокусот го стави на блокирање на институциите и правење што поголема штета за државата.
Надворешниот фактор, пак, е поврзан со искуствата на Европската комисија со претходните процеси на проширување, поради што со новите инструменти се предвидени повеќе рестрикции кои ги ограничуваат обемот и областите на прилив на европски фондови“, вели Владата.
Во изјавата на ЕК испратена утринава од Брисел, се вели дека властите во Македонија немаат ниту политичка волја за исполнување на ветените реформи:
„Во последниве години и особено во текот на минатата година, Европската комисија постојано на властите им ја искажуваше својата загриженост за тоа дека нема подготвеност и нема зрелост во планирањето во клучните сектори, како и дека нема политичка посветеност за да се исполнат потребните секторски реформи, а нема и посветеност за реформи воопшто. Како резултат на ова Комисијата сега мора да ја намали финансиската помош која ја имаше предвидено за 2016, а исто така одлучи и да не продолжува со нов проект”.
ЕК додава дека кратењето во моментов изнесува 27 милиони евра. И најавува дека од кратење ќе страдаат и проектите од транспортниот коридор 8 за изградба на пругата кон Бугарија.
Во соопштението на ЕК се вели дека “има многу недостатоци во транспортниот сектор кои спречуваат коректно планирање и координација” и дека “земјата треба да се фокусира на мерки кои ќе овозможат одржливост на големите инфраструктурни проекти”.
Можно е европската помош за судството во висина од 13 милиони евра да биде скратена поради тоа што во Брисел се уште важи оценката дека и покрај сите владини заложби и европска помош, судството и понатаму е зависно од власта.
„Влошувањето на политичкиот контекст е една од причините зошто Владата и администрацијата за жал не биле способни, или немале волја, да ги испорачаат реформските определби или да покажат неопходна подготвеност за реформи или примена на фондовите на ЕУ”, вели Комисијата.
И европските ревизори со седиште во Луксембург објавија извештај неделава за европската помош за Македонија. Заклучокот на оваа институција е строг и вели дека примената на европската помош за јавната администрација има многу ограничен напредок.
„Националните власти треба да се фокусираат на две клучни точки: борбата против корупцијата и јавните набавки. За таа цел земјата треба да преземе сериозна обврска, многу поголема од сегашната. И да се сети дека ова е голема можност да се има добра јавна администрација”, вели Ханс Густаф Весберг, член на Европскиот ревизорски суд.
Според ревизорите, проблемот лежи кај властите кои не даваат активна поддршка за ефикасна употреба на европските пари.
Овој извештај може да се смета како најава за идните кратења на помош за Македонија во областите на борба против корупцијата и јавните набавки.
Брисел предвиде 664 милиони евра за Македонија во периодот од 2014 до 2020 година за повеќе сектори помеѓу кои се јавната администрација, транспортот, борбата против корупцијата, владеењето на правото или фундаменталните права.
Помеѓу 2007 и 2013 година Македонија имаше предвидено 615 милиони евра за Македонија но овие пари не се употребени како што било планирано.