Владата објави дека ќе набави нова аудио-визуелна опрема за потребите на владиниот прес-центар и тврди дека со новата техничката опрема “првенствено ќе се излезе во пресрет на потребите на новинарите и квалитативно унапредување на условите за работа, запазувајќи ги високите стандарди на оперативност и функционалност”.
Како што вели соопштението од владата “тоа ќе овозможи подобри услови за презентација на владините политики и проекти, за инклузија на поголем број мислења во креирањето на истите, како и поголеми можности за дебата и подобра информираност на граѓаните и субјектите за можностите кои се обезбедуваат и ќе продолжат да се обезбедуваат преку реформите”.
Во соопштението владата не ја открива цената на својот нов шопинг. Според ТВ 24 вести опремата ќе чини околу милион евра. Тендерот го добил „Македонски Телеком“ во отворена постапка а критериум за доделување била најниската понудена цена. Опремата треба да биде инсталирана за еден месец.
“Значајно е да се истакне дека запазени се сите законски процедури, и избрана е најповолната и најевтината понуда која одговара на пропишаните критериуми, притоа со одличен квалитет. Постапката е спроведена низ транспарентна процедура запазувајќи ги пропишаните правила во Законот за јавни набавки”, вели владата и додава дека “ќе продолжи да придонесува за создавање на поквалитетни услови за работа на новинарите, целосно почитувајќи ја значајноста на нивната работа и придонес, и во таа насока сме отворени за сугестии од секоја заинтересирана страна”.