На форумот „100 дена од мандатот на новата Влада“ премиерот Ковачевски и министрите направија резиме на досегашното работење и одговараа на прашања, при што главната улога му беше доделена на шефот на Владата.
На прашањето за перспективите на ЕУ интеграцијата на Македонија и пораките од САД и Франција дека стабилноста на Западен Балкан зависи од овој процес, Ковачевски одговори со осврт на дијалогот со Бугарија и рече дека тој треба да се води со взаемна почит и водење сметка за достоинството на двете страни.
„Мора да се сочува достоинството на граѓаните на двете држави. Така дијалогот ќе вроди со резултат за градење добри односи меѓу соседи и земји членки на ЕУ. Честопати оваа дискусија е преземена од националисти и популисти и тоа не е добро. Ние, како европски влади имаме обврска да наметнеме позитивен наратив кој ќе ни овозможи отпочнување на преговори за членство во ЕУ“, рече Ковачевски.
Во однос на енергетската криза што ја дочека Владата на стартот на самиот мандат, шефот на Владата рече дека државата веќе има јасна слика за производството на електрична енергија. „Новата фотонапонска електрана ‘Осломеј’ ќе произведува чиста, домашна енергија и ќе придонесе кон заштита на животната средина. Со оваа електрана освен што ќе ги снабдиме потребите на околу 2.800 домаќинства со електрична енергија, правиме и култивација и оплеменување на 15 хектари површина. Ова е прв проект со кој се заменува производството на електрична енергија од загадувачка технологија во чиста технологија и како таков е пример и за идните проекти за енергетска транзиција во земјите на Западен Балкан“, рече Ковачевски.
Тој додаде и дека има големи очекувањата и од проектот ХЕЦ Чебрен кој се наоѓа во во втора фаза во која треба да се избере изведувач од 9-те понудувачи.
„Дополнително веќе ја отпочнавме изградбата на далноводот Битола – Елбасан што значи поврзување со единствената држава со која немавме поврзување со 400 киловолтен далновод тоа е Албанија и со тоа сме држава која непречено може да ја транспортира енергија преку својата територија и од Грција, Бугарија, Србија, Косово и Албанија и да се градат дополнителни капацитети кои ќе можат да бидат продавани“, рече Ковачевски.
Во однос на земјоделското производство, посочи премиерот, направен е нов план за инвестирање во пченка, пченица, јачмен и сончоглед, во полјоделството, сточарството и овоштарството. Притоа, како што рече Ковачевски, за прв пат се воведуваат авансни субвенции и тоа оваа година во овоштарството, при што 30 отсто од износот ќе се исплати пред да започне сезоната, а 70 отсто според планот за исплата на субвенциите. Ќе бидат зголемени и субвенциите за пченица, пченка и сончоглед.
Тој посочи дека целта е со оваа поддршка да се одговори на светската економска криза, која претставува една од најголемите по Втората светска војна, а е предизвикана од агресијата на Русија врз Украина, „но и да станеме увозно независни со достапна и поевтина храна“, нагласи премиерот Ковачевски.
„Ние како држава имавме сосема погрешен концепт на субвенционирање, којшто беше воведен доминантно заради финансирање покрај на земјоделството и финансирање на други политички цели. Ако ги погледнеме бројките на инвестирани 8-9 милијарди денари на годишно ниво и повеќе, ние имаме секоја година помало производство на храна, поголем увоз на храна и драматично помало производство на стратешки прехранбени производи“, истакна Ковачевски.
Тој додаде и дека со 26 антикризни мерки е спречен ударот од големиот ценовен шок во услови на историски највисоки цени на храна и енергенси. „Со намалување на ДДВ-то и акцизите имаме најниска цена на нафта и нафтени деривати во регионот. Со намалување на данокот на додадена вредност од пет проценти на нула проценти, и со ограничувањето на малопродажните и големопродажните маржи на основните прехранбени производи, успеавме да спречиме огромен раст на цените и да го заштитиме стандардот на граѓаните“, истакна Ковачевски.
Го ублаживме, притоа рече тој, големото поскапување на храната и енергенсите. „Со антикризните мерки кои ги воведовме, граѓаните месечно заштедуваат по 300 денари за нафта, по 1.500 денари за храна и по 2.150 денари за сметката за струја. Ефектите од овие мерки значат заштеда од скоро 4000 денари месечно за секој граѓанин“, дополни Ковачевски.
„Дополнително, од пакетот антикризни мерки – операционализацијата на бескаматните кредити од Развојна банка во вредност од 5 милиони евра за три поволни кредитни линии за поддршка и развој на приватниот сектор, ќе обезбедат поддршка за стопанството и ликвидност на компаниите“, подвлече Ковачевски во настапот по повод стоте дена на Владата што ја предводи. (С.К.)