Владата на Република Северна Македонија денеска во Занаетчискиот дом во Куманово ќе ја одржи својата редовна 171. седница со која ќе претседава премиерот Зоран Заев, а ќе присуствуваат сите министри, гости и градоначалниците од регионот. Приоритет на седницата ќе имаат информациите и одлуките за проекти од непосреден интерес на граѓаните на општините од регионот, за што во текот на денот ќе претходат и повеќе теренски активности.
Министерот за транспорт и врски, Горан Сугарески и директорот на Јавното претпријатие за државни патишта, Зоран Китанов, ќе извршат увид во работите на рехабилитацијата на регионален пат Куманово – Св. Николе. Настанот е предвидено да се одржи во 11:30 часот на околу 500 метри од Затворот во Куманово.
Министерот за здравство, Венко Филипче во 13 часот ќе ја посети општата болница во Куманово, а теренски активности ќе има и министерот за земјоделство, шумарство и водостопанство, Трајан Димковски, кој ќе ја посети компанијата за месна индустрија „Никси“, како еден од корисниците на средства од ИПАРД програмата.
Од попладневните активности, во 15 часот во Здружението на пензионери, министерот Венко Филипче ќеима средба и со пензионери од Куманово и регионот, а во 17 часот министерката за труд и социјална политика, Мила Царовска ќе се сретне со корисници на социјална пензија од Куманово и регионот.