„Се очекуваше дека ќе има отпор на имплементацијата на Бриселскиот договор меѓу Косово и Србија“, вели во интервју за „Анадолија“ советникот за надворешни работи во Владата на премиерот Хашим Тачи, Азем Власи.
– Косовските Срби, иако и понатаму сакаат да даваат отпор, во овие 14 години беа поддржувани од Белград да се спротивставуваат на интеграцијата во косовскиот уставен систем. Вербалните поддршки од Милорад Додиќ и српските екстремисти кои пристигнуваат од Босна, се само продолжена рака на овие последни остатоци од старата политика која догорува токму на прашањето за договорот од Брисел и северниот дел на Косово. Во следниот период ќе има уште отпори, но сепак договорот мора да биде применет бидејќи нема алтернатива, изјави Власи.
Тој истакна дека Белград се плаши од натамошни проблеми и немири на Косово, бидејќи и самата власт во Србија долго „држела на далечинскиот управувач и поттикнувала лажни надежи на Србите од северниот дел на Косово дека овој дел од територијата ќе биде во состав на Србија, а тие под власта на Белград“.
– Сега власта во Белград се соочува со последиците од сопствената досегашна погрешна политика.
Според него, на Србија не може да и се повтори Ѓинѓиќ, алудирајќи на атентатот на поранешниот српски премиер, „човекот кој силно ги афирмирал промените во оваа земја“.
– Времето на Милошевиќ и времето кога можеше да се повтори „случајот Ѓинѓиќ“ во Србија дефинитивно му припаѓаат на минатото. Може да има уште многу проблеми, но нема да има ситуации какви што имавме во времето на Милошевиќ и Ѓинѓиќ, кога беа многу силни тие конзервативни и ретроградни сили. Главен доказа за тоа е што луѓето од политичката кујна на Милошевиќ се сега на власт, но ја свртеа Србија во значително поинаков правец. Србија го губи чекорот со современите европски и светски трендови и тие тоа го разбраа, заклучи Власи.