Со овој Предлог на Закон, вели координаторот на пратеничката група на ВМРО-ДПМНЕ Никола Мицевски, ние предвидуваме и бараме бришење на одредбите од законот за начинот на избор на Владата кои предвидуваа сто дена пред одржувањето на парламентарни избори да се избере нова, преодна Влада.
Втората клучна интервенција во овој Предлог на Закон е тоа што предлагаме и бараме согласно Деловникот за работа на Собранието, овој Предлог на Закон да биде ставен како точка на дневен ред на 61-та седница на Собранието на Република Македонија која што треба да се одржи во среда, 26.01.2022 година. Токму од овие причини, овој Предлог на закон го поднесовме по скратена постапка.
Дополнително, сакам да ја информирам јавноста дека денес на редовната понеделничка координација кај Претседателот на Собранието, ги понудивме овие измени на Законот за поддршка и потпис и до парламентарното мнозинство, но тие не се изјаснија по ова прашање. Очигледно, тие се плашат од гласот на народот и се плашат од брзи и предвремени парламентарни избори со кои што граѓаните ќе добијат народна, ефикасна и посветена Влада насочена исклучиво кон решавање на секојдневните проблеми на граѓаните, изјави Мицевски.
Оттука, ние како пратеници од ВМРО-ДПМНЕ очекуваме барањето да се стави како точка на дневен ред на седницата која што ќе се одржи во среда, согласно Деловникот, да биде прифатено и да добиеме можност пред целата македонска јавност да дискутираме и аргументирано да дебатираме за оваа проблематика и за клучната потреба од измени на Законот за Влада, потенцира координаторот на пратеничката група на ВМРО- ДПМНЕ. 
