Во наредните денови ВМРО-ДПМНЕ ќе понуди пакет клучни реформи во областа на медиумите и правосудството согласно препораките на Европската Комисија и извештајот на Прибе. Ова не денешната партиска прес-конференција го соопшти пратеникот Владимир Ѓорчев – член на ИК на ВМРО-ДПМНЕ.
Тој најави дека јавноста навремено ќе биде информирана за сите идни чекори, но посочи и дека владејачката партија „нема да чека и да остави судбината на државата да зависи само од добрата воља на Зоран Заев и структурите на СОРОС.“
Македонија има капацитет и ќе го пронајде излезот од сегашната состојба. Тој излез сигурно не е продолжување со манипулациите и хипокризијата која што СДСМ ја демонстрира секојдневно. Целта на СДСМ и Соросовите структури е пролонгирање и продлабочување на дестабилизацијата, деструкцијата и кризата.
-СДСМ и СОРОС мора да се откажат од насилствата и од деструкцијата. СДСМ и СОРОС мора веднаш да престанат да ги малтретираат граѓаните со блокирање на улиците и брутално уништување на јавниот имот. СДСМ и СОРОС мора веднаш да ја надоместат штетата што ја направија, уништувајќи ги објектите на институциите и спомен обележјата.
СДСМ за прв пат во својата историја треба да се обиде да направи програма и наместо деструкција да понуди нешто конструктивно за сопствениот народ. СДСМ треба да прифати јавно дека народот е тој што одлучува во Република Македонија и само народот може да му го даде мандатот на тој што ќе ја води државата, рече Ѓорчев.
Тој го повика опозицискиот лидер Зоран Заев да побара да се повлече аболицијата за него дадена од екс претседателот Црвенковски за случајот „Глобал“. Исто така тој го повика и сопругот на Радмила Шекеринска, кој се најде на листата од 56 аболицирани лица до Иванов веднаш да побара повлекување на аболицијата, а доколку не го стори, Шекеринска да си поднесе оставка.
-Во случај Заев и Шекеринска да одлучат да се кријат и да молчат околу поднесување на барањата за деаболиција, ВМРО-ДПМНЕ го повикува Јавното Обвинителство да отпочне постапки за одземање на криминално стекнатиот имот, бидејќи законот мора да важи за сите подеднакво и не смее да се дозволи само заради партиските функции некому да му биде дозволено да замине неказнето со незаконски стекнатиот имот.
Овие точки се многу едноставни и правични и со нивно исполчнување, СДСМ може да докаже дека кај нив постои волја во иднина да се откажат од деструктивната политика. Овие точки се базирани на основните принципи на демократијата и владеење на правото и ги поддржуваат мнозинството од граѓаните, рече Ѓорчев.