Опозициската ВМРО-ДПМНЕ утринава преку соопштение до јавноста искажа серија сомнежи за организираниот чартер лет до Порто, Португалија каде што утре нашата фудбалска репрезентација ќе настапи против португалската.
Во центарот на обвинувањата е братот на заменик премиерот Артан Груби, кој според опозициската партија е сопственик на патничката агенција ЕТЦ ТРАВЕЛ преку која како што навестуваат е организиран превозот на навивачите и другите патници кои утре вечер ќе ја бодрат нашата репрезентација на трибините.
„Дали ЕТЦ ТРАВЕЛ, Агенција сопственост на братот на Артан Груби ќе профитира од аранжманите за Порто за мечот Македонија – Португалија!? Дали чартер летот што ќе го организира ФФМ, а ќе чини 500 евра по човек ќе биде преку Туристичката агенција ЕТЦ ТРАВЕЛ, сопственост на Ветон Груби, брат на Артан Груби? Дали браќата Груби сакаат да профитираат од спортот, и од сите оние наши сограѓани кои ќе сакаат да одат да ја бодрат нашата репрезентација, а тоа ќе мора да го сторат преку чартер летот кој ќе се одвива преку ЕТЦ ТРАВЕЛ на Груби?“, се вели во реакцијата.
ВМРО-ДПМНЕ притоа тврди дека доколку се пријават 200 наши сограѓани, браќата Груби би инкасирале 100.000 евра, а доколку се пријават 400, како што велат, сумата која ќе ја наплати Агенцијата на Груби ќе биде 200.000 евра.