ВМРО-ДПМНЕ попладнево ги продолжи протестите преку кои бараат Владата да ги соопшти деталите од преговорите со Бугарија. Според донесената одлука на Извршниот комитет на партијата во саботата во Битола, ВМРО-ДПМНЕ протестираат денеска и утре од 17 до 19 часот.
За разлика од минатата недела кога беа блокирани крстосници во центарот на Скопје, раководството, членови и симпатизери на партијата протестираат пред Министерството за надворешни работи.
Протестот се одржува во пресрет на седницата на собраниската Комисија за надворешна политика, закажана за в среда во 15 часот. Со неа претседава Антонио Милошоски, а шефот на дипломатијата Бујар Османи соопшти дека ќе одговори на барањето на опозицијата да присуствува и да реферира по единствената точка од дневниот ред – Разгледување на прашањето за почеток на пристапните преговори со ЕУ за време на португалското претседателство, а во контекст на Договорот за добрососедство, пријателство и соработка со Бугарија.
Опозициската партија од МНР и Владата бара да биде објавено за што конкретно се преговара за добивање датум за почеток на преговори со ЕУ, во пресрет на португалското претседателство. Нивниот став е дека не прифаќаат ниту дел од декларацијата донесена во Парламентот на Бугарија во октомври 2019 година да биде дел од преговорите кои деновиве се водат интензивно.