Предлогот на СДСМ за главен уредник на информативната програма на МРТВ да биде именувана Санта Аргирова е прифатлив за ВМРО-ДПМНЕ.
Ова пред малку го изјави претседателот на оваа партија Никола Груевски кој за кусо излезе од средбата на четирите партии која се уште е во тек во Клубот на пратениците.
Според Груевски, овој предлог на опозицијата е знак дека партијата нема волја да се реши кризата поради тоа што на ова место се предлага личност која, според Груевски, е политички определена. Но, и покрај тоа, тврди Груевски, неговата партија сака да им го одземе можното алиби на СДСМ за одложување на изборите и токму од таа причина ВМРО-ДПМНЕ одлучила да го прифати овој предлог.
Груевски рече исто така дека од истите причини, за да нема СДСМ алиби за одложување на изборите, ВМРО-ДПМНЕ одлучила да ја прифати методологијата според која ад-хок телото ќе ги мониторира медиумите за време на изборите.
Сега, според Груевски, останува на албанските партии и на СДСМ да се договорат за петтиот член на ад хок телото за медумите. Со тоа, вели Груевски, патот за избори е отворен и се зависи од Заев, Ахмети и Тачи бидејќи ВМРО-ДПМНЕ се согласил на сите предлози.
Груевски излезе од преговарачката маса и рече дека неговата партија ќе се врати да стави потпис ако останатите лидери се договорат.