ВМРО-Народна партија предлага сите политичари кои ќе ја прифатат аболицијата од претседателот Ѓорѓе Иванов во наредните 10 години да не смеат да извршуваат јавна, државна или политичка функција.
Оние пак, кои нема да ја прифатат, според ВМРО-Народна треба со правна регулатива во законот, да можат по редовна судска постапка да ја докажат својата невиност.
– ВМРО-Народна партија изразува разочарување од големата медиумска застапеност на политичари опфатени со аболицијата кои без срам и перде и со невидена хипокризија се појавуваат во јавноста. Тие залудно се обидуваат да се прикажат како жртви на наместени судски прогони, очекувајќи со тоа дури да им се зголеми рејтингот градејќи имиџ на чесни политичари, наместо со минимум искажано достоинство да се повлечат и да се сокријат од критиките и бесот на јавноста, се вели во партиското соопштение до медиумите.
Тие велат крајно се загрижени од новонастанатата ситуација предизвикана од “скандалозната одлуката на претседателот Ѓорѓe Иванов за аболиција“.
– Со ова општата криза во Р.Македонија дополнително се искомплицира и стана неподнослива, политичкиот систем скоро и да не постои, правниот систем е комплетно суспендиран, жестокоста помеѓу спротивставените страни е донесена до критично ниво, а меѓународниот углед на Р.Македонија е до крај срозен, смета партијата.
ВМРО-Народна ги повикува четирите политички партии како најодговорни и најлегитимни според Пржинскиот договор, веднаш да седнат на заедничка маса и како единствено можно решение во овој момент да го прифатат овој предлог.