Во Албанија годинава се регистрирани 92 нови лица инфициирани со ХИВ вирусот меѓу кои две се деца. Во истиот период починале 20 заразени лица пришто кај половина од нив болеста била дијагностицирана во краен стадиум.
Од 1993 година, кога е регистриран првиот случај на ХИВ позитивен во Албанија, според Институтот за јавно здравје регистрирани се 1.195 случаи (44 деца кои вирусот го добиле од нивните мајки).
Од вкупниот број на заразени, повеќето се мажи хетеросексуалци, 66 отсто од лицата инфицирани со ХИВ знаат дека се заразени, 42 отсто добиваат лекарски третман, додека 14 отсто имаат пренослив вирус.
Најголем број новозаразени на годишно ниво се евидентирани пред две години и тоа дури 150 лица додека лани нивниот број беше 100.
Како последица од оваа болест во изминатите 25 години во земјата починале околу 200 лица. Бројот на смртни случаи лани беше 15, а пред две години 23.
Најмногу ХИВ позитивни лица има во Тирана (6,4 на секој 10.000 жители), по главниот град е Леска со пет заразени на 10.000 жители, а на трето место е приморсикот град Валона.