Министерот за економија Крешник Бектеши изјави дека се планира во август да се прогласи кризна состојба во делот на електричната енергија. Состојбата е непредвидлива и сериозна, претстојната зима ќе биде тешка, порача Бектеши.
„Ние планираме да ја ставиме во функција Комисијата согласно Законот за енергетика и да прогласиме кризна состојба во август во делот на електричната енергија, но таа Комисија предвидува различни мерки вклучувајќи ги и рестрикциите, кои може да се избегнат ако нема забрана за увоз на струја што сме го имале тоа како ситуација во Република Северна Македонија кога го правела Бугарија во одредени периоди “, изјави министерот за економија Бектеши.
Тој информира дека „кризната состојба согласно уредбата е со цел да се интервенира со финансиски средства во енергетските компании , зашто вчера е донесена одлука од страна на ЕБОР за обезбедување на 100 милиони евра за потребите на ликвидноста на ЕСМ за да може во одредени периоди да купува електрична енергија и да се купуваат јаглен и мазут за три блока во РЕК Битола, ТЕЦ Осломеј и за ТЕЦ Неготино со цел хидропотенцијалот да се чува за зима, рече Бектеши.
Тој кажа дека земјава била во потрага по алтернативни решенија за енергенси, ако целосно се забрани увозот на електрична енергија а при недостаток на природен гас, се размислува некои од фирмите да се префрлат на друг енергенс како што е јагленот и мазутот.
„За се на планот на енергенсите ќе ги следиме одлуките на Европската Комисија, рече Бектеши, бидејќи ако сме го одбрале тој курс треба да се споделува и доброто и лошото. Македонија нема билатерален договор со некоја земја за испорака на гас, кој кај нас протекува од Бугарија чиј дел до 2030-та година го има закупено Гаспром. До сега сме биле снабдувани од Гаспром. Инаку нема да купуваме гас во рубљи , ако е таква политиката на ЕК. Се разгледува можноста за користење на течен гас од терминалите од Грција и Турција и гас од Азербејџан, нагласи Бектеши.
Тој истакна дека и компаниите како и граѓаните се субвенционирани во делот на потребите за електрична енергија и дека од над 70.000 компании 67.000 илјади го искористиле тоа. Само уште околу 4.500 компании биле на слободниот пазар и дека ќе разговарале со Стопанската комора како да им се помогне и ним.
Мирјана Трпческа