Црногорската полиција денеска приведе неколку активисти на движењето „Отпор против диктаторскиот режим во Црна Гора“, кои фрлаа јајца врз влезот на Парламентот, каде се расправаше за предлог-законот на опозицијата за распишување на нови претседателски избори.
Опозицијата предложи Парламентот на Црна Гора да ги прогласи за невалидни претседателските избори од 7 април, на кој победи Филип Вујановиќ, поради повреда на Уставот, законите на Црна Гора и на принципите на меѓународното право.
Предлогот е претседателот на Парламентот Ранко Кривокапиќ да распише нови претседателски избори најдоцна до 31 август.
Според конечните резултати на Државната изборна комисија на Црна Гора Вујановиќ на 7 април освоил 51,21 проценти од гласовите, додека за независниот кандидат Миодраг Лекиќ гласале 48,79 од граѓаните. Изборниот штаб на Лекиќ изјави дека не ги признава резултатите од изборите. Но, и покрај тоа Вујановиќ на 20 мај положи заклетва како претседател и го почна петгодишниот мандат.