Осумстотини и шеесет судски предмети воопшто не влегле во АКМИС системот и не биле електронски прераспределени кај судии, потврдуваат од Министерството за правда.
АКМИС е електронски систем преку кој случаите требаше да бидат распределувани – софтверот требаше самиот да ги бира судиите кај кои се назначуваат предметите.
Овој систем требаше да спречи злоупотреби и манипулации, односно главниот предизвик беше да се спречи влијание на судиите преку местење одредени судски процеси.
Според информациите од Комисијата за НОВА ТВ составена од Министерството за правда, последните десетина години, предметите воопшто не биле ставани во овој систем. Нашите извори велат дека системот не само што функционирал исправно, туку и софтверот имал сериозни пропусти, а дополнително службениците иако имале обврска да го користат системот, сами одлучувале на кој судија да му ги доделат предметите.
За АКМИС системот јавноста прв пат дозна откако се формираше Специјалното јавно обвинителство, поточно кога Кривичниот суд креираше мрежа од едни исти судии кои беа назначувани да ги работат случаите на СЈО. Тогаш прв пат се отвори сомнежот за злоупотреби, а дека злоупотребите биле поголеми размери од очекуваното го потврди и Комисијата.
Извори во судот за НОВА ТВ раскажуваат како изгледале злоупотребите. На пример, по пристигнувањето на предметите во судот, биле собирани кај еден судски службеник до 15 часот, но во моментот кога требало да се врши распределбата, не функционирале копчињата за нотификација, па наместо по случаен и електронски пат, службеникот сам на своја рака одбирал кој предмет кај кој судија и судечки совет ќе одат. Ова е спротивно на Законот за управување со движењето на предметите во судовите кој ја уредува оваа материја, велат од комисијата. Во него во делот за автоматизирано распределување на предметите пишува:
ЕДНА ГОДИНА ДОБРО ЧУВАНА ТАЈНА И ЗЛОУПОТРЕБИ
Прашањето кое се поставува е: Кој ја имал одговорноста но и контролата врз системот. Според законот претседателот на судот е оној кој е задолжен да го контролира функционирањето на системот, но и оној кој имал целосен пристап до софтверот.
Според законот, претседателот на судот е тој секојдневно ја следи состојбата со движењето на предметите особено со предавање на предметите во работа, прераспределба на предметите, закажување на расправи/рочишта, преземањето на судски дејствија надвор од судската зграда, донесување, изготвување и објавување на одлуките, и состојбите со функционирањето на автоматизираниот информатички систем за управување со судските предмети.
За овие состојби актуелниот претседател испратил известување до Врховниот суд кога дошол на функција.
Претседателот на Врховниот суд, Јово Вангеловски во изјава за „Телма“ изјави дека ова треаело со години.
„Траело со години, од страна на претходните претседатели (една поранешна претседателка и еден поранешен претседател на судот) па се до стапувањето на функција на В.Д. претседателот Стојанче Рибарев. Знам, бидејќи кога ќе видите дека на корицата на предметот пишува име на судијата кој ќе го води случајот со параф од претседателот на судот тогаш е јасно. Тоа е повеќе напишано како наредба до писарницата“, рече Вангеловски.
Судскиот совет уште пред една година констатирал неправилности со АКМИС системот. Во судот пак на седница одржана на 11 ти септември се разговарало на оваа тема. Две судијки, Весна Димишкова и Славица Андреевска реагирале и се жалеле за начинот на распределба на предмети. Тие се оние кои настрадаа со распоредот на судии кои неколку пати беше менуван од поранешните претседатели. Но, што ја предизвика истрагата.
Изворите на НОВА ТВ потврдуваат дека Извештајот кој го подготвува Комисијата од Министерството за правда најверојатно ќе биде презентиран идната недела. Но од понеделник според неофицијални информации истата комисија ќе проверува и како функционирале системите во Врховниот суд и скопска апелација. Она што ќе го открие ќе го испрати до Судскиот совет и јавното обвинителство кое ќе има задача да истражи дали има злоупотреби.