Денес, на Денот на македонскиот јазик, со свечен, виртуелен настан ќе се одбележат 60 години од отпочнувањето на изучувањето на македонскиот јазик, литература и култура на Филозофскиот факултет при Универзитетот во Љубљана. Во академската 1961/1962 година, во Љубљана беше отворен првиот лекторат по македонски јазик во светот, за набрзо потоа да прерасне во Катедра за македонски јазик и книжевност, којашто и денес успешно функционира во рамките на Одделот за славистика.
По тој повод, честитка до Филозофскиот факултет во Љубљана упати директорката на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје, Весна Мојсова-Чепишевска.
„Сакам да се заблагодарам на Филозофскиот факултет во Љубљана што прв во југословенски образовен систем распиша конкурс за лектор по македонски јазик, уште во 1960 година. Тоа е неколку години пред да ја започне својата работа Семинарот за македонски јазик, кој од 1967 година континуирано се грижи за сите лекторати по македонски јазик на странските универзитети. Сакам и да им се поклонам, и на Блаже Конески и на Харалампие Поленаковиќ, кои во тој период, едниот како шеф на Катедрата за македонски јазик и јужнословенски јазици, а другиот како шеф на Катедрата за македонска книжевност и јужнословенски книжевности до Деканатот на Филозофскиот факултет во Љубљана ја испраќаат својата стручна оценка за кандидатот Блаже Ристовски. Поклон и за првиот лектор по македонски јазик – Блаже Ристовски кој ја започнува историјата на оваа македонистика во учебната 1961/62 година“, истакнува Мојсова-Чепишевска во честитката.
Филозофскиот факултет на Љубљанскиот универзитет постојано дава поддршка на македонистиката. Во одредени периоди имало опасност катедрата да биде затворена но во 1999 година на нејзино чело доаѓа Катерина Велјановска, која е таму до 2001 година а од 2002 година неа ја наследува Намита Субиото. „Благодарение на нејзината заложба се засилува и соработката со нашиот оддел при УКИМ, па така во тие нејзини 20 години на овој наш XXI век, на летните и двете зимски школи учествуваа над 50 студенти и професори од Филозофскиот факултет во Љубљана“, вели Мојсова-Чепишевска.
Во школите од Словенија се создаде една нова група преведувачи кои се истакнаа со своите преводи на македонската книжевност на словенечки јазик: Соња Должан, Соња Цекова-Стојаноска, Лара Миховиловиќ, Тимотеј Сенчар, Маја Ковач, Сашо Пуљаревиќ… Дел од нив имаа свој влог и во двата зборника „Конески на 11 јазици“, коишто беа објавени минатата година, по повод 100-годишнината од неговото раѓање.
„Се надевам дека оваа бројка од педесетмина, секоја наредна година ќе се зголемува и зголемува, а еве, најновите ги чекаме на престојната 55-та Летна школа. Се надевам дека ќе се зголемуваат и преводите на македонската литература на словенечки, нивните и на некои други, нови словенечки македонисти“, вели директорката.
Големиот јубилеј, 60-годишнината од постоењето на Катедрата за македонски јазик и книжевност на Одделот за славистика на Филозофскиот факултет при Универзитет во Љубљана, се одбележува со свечен, виртуелен настан токму денес, на Денот на македонскиот јазик.
На овој настан, предавање ќе одржи д-р Катерина Велјановска од Филолошкиот факултет„Блаже Конески“ при УКИМ, која од 1999 до 2001 години ја водеше љубљанската македонистика. Присутните во Љубљана ќе ги поздрават и деканката на Филозофскиот факултет, д-р Мојца Шламбергер Брезар, македонската амбасадорка во Словенија, Сузана Зелениковска и раководителката на Одделот за славистика, д-р Шпела Севшек Шрамел. На настанот ќе биде претставен и историјатот на македонистиката на Филозофскиот факултет во Љубљана, во форма на видео-колаж од изјави на студенти, професори и претставници на институциите со кои Катедрата за македонски јазик и книжевност на Љубљанскиот универзитет има активна соработка. (Р.Н.)