Нашиот капитализам е втемелен само на парите,односно на оној што ги поседува парите а не и на вредноста на трудот.
Тито Петковски
Прогресивниот дел од светот го слави Меѓународниот ден на трудот.Скромно се одбележува и кај нас,благодарејќи на некои синдикати.Полека,но сигурно се потиснува во заборав поради силниот противење на десно ориентираните власти.
Неолибералниот модел на капитализмот во Македонија ги релативизира и девалвира работничките права. Ги уништи синдикатите, го промовираше рамниот данок, притоа фаворизирајќи ги компаниите со странски капитал.
На спроти тој модел,во кој социјалните прашања и проблеми од делот на работните односи се фрлени на маргините,на македонското општество му е потребен социјален договор создаден од граѓаните.
Само на овој начин, преку социјален договор втемелен на взаемна доверба и изградено чувство на правда,може да се врати довербата во институциите на системот. Огромните социјални разлики помеѓу работодавачите и работниците создадоа јасна перцепција кај јавноста за непостоење на социјална правда во Македонија.
Сопствениците на капиталот уживаат во големите материјални привилегии кои далеку ги надминуваат нивните реални потреби,додека пак од другата страна ги имаме работниците кои со своите примања, честопати неможат да ги задоволат нивните егзистенцијални потреби. Оваа состојба го разјадува социјалното врзивно ткиво на македонското општество.
Главниот проблем лежи во фактот што,според нашите прописи единствено парите имаат третман на капитал во системот што го градиме. Трудот,во таквиот систем е само пазарна категорија. Стока на пазар,игнорирајќи го како важен елемент во создавањето на профит и не признавајќи ја неговата улога на капитал.
Нашиот капитализам е втемелен само на парите,односно на оној што ги поседува парите а не и на вредноста на трудот.
Отпорот кој доаѓа од работната сила најчесто манифестиран како штрајк и е израз на барањето на трудот да биде признаен, односно вреднуван како капитал. Работникот не ја прифаќа позицијата во која е ставен без своја воља и согласност. Неговата борба за работничките права,достоинството на трудот,социјалната правда и социјалната држава мора да продолжи.
Честит 1 Мај!