Во 2012 година, деловните субјекти кои се занимаваат со градежна дејност извршиле градежни работи во вредност од 300,3 милиони евра.
Од нив, 194 милиони евра се за објекти кои не се во индивидуална сопственост, значи се во сопственост на државата или на фирмите.
Во скопската Општина Центар се изградени 133 државни објекти и објекти во сопственост на фирми и оваа бројка е најголема споредено со сите други скопски општини, но и со сите други статистички региони во државата, освен пелагонискиот, каде што бројката на вакви објекти е поголема и изнесува 158. Но, нивната вредност од 43 милиони евра е далеку помала од вредноста на ваквите објекти изградени на територијата на Општина Центар, чија вкупна вредност е над 71 милион евра.
Уште повеќе, вредноста на деловните и државните објекти во скопски Центар е поголема од сите вакви објекти во сите статистички региони во земјава заедно, освен пелагонискиот. Вкупната вредност на сите овие објекти во сите 6 статистички региони, без пелагонискиот, но вклучувајќи го и скопскиот регион (без Општина Центар) изнесува 70 милиони евра или еден милион евра помалку од ваквите објекти изградени само на територијата на Општина Центар.
Во скопскиот регион, пак, најблиску до Општина Центар по бројот на изградени објекти во сопственост на државата или на фирмите е Кисела Вода со 62 вакви објекти наспроти 133-те во Центар, но вредноста на ваквите објекти во Кисела Вода е само 6,3 милиони евра наспроти вредноста на оние во Центар, кои вредат 71 милион евра. Вредноста на сите вакви објекти во остатокот од скопскиот регион, кој ги опфаќа сите скопски општини и други општини надвор од градот, изнесува 26,9 милиони евра.