Денеска продолжува потрагата по 31-годишниот Мартин Јовановски кој 14-ти ден се води како исчезнат, од саботата, на 9 јули кога заедно со неговите двајца пријатели решиле да нурнат на плажата Мити во Посеиди, Халкидики и беа однесени од силни морски струи. Сојузник им е доброто време и мирното море, што не беше случај во првите денови од потрагата, кога беа спасени неговите двајца пријатели Васил и Иван.
Воздушните средства на Солунскиот аероклуб денеска повторно ќе се обидат да ја скенираат областа, додека потрагите ќе се префрлат и на исток, односно на Света Гора, бреговите на Лезбос и Самос со помош на двата брода на ОФКАТ и околу 8 доброволци, јавуваат грчките медиуми.
Како што изјави за ThessToday.gr шефот на ОФКАТ, Христос Рамос, кој е задолжен за потрагата од првиот ден на исчезнувањето, мајката и братот на несреќниот Мартин остануваат во Неа Скиони со надеж дека спасувачките служби и волонтерите кои се на теренот ќе го најдат. Меѓутоа, волонтерите од Северна Македонија кои пристигнаа на Халкидики за да помогнат во потрагата сега си заминаа и се вратија во својата земја, рече Рамос.
Вчера двата пловни објекти на ОФКАТ ги „прочешлале“ плажите Катерини, Макригијалос, Метони, а исто така и заливот Термаикос. Истрагите до денеска беа успех, а не се пронајдени никакви траги за Мартин, но, како што Рамос истакна за ThessToday.gr, нема да запрат додека не го пронајдат.
Мајката на 31-годишниот Мартин се надева дека синот ќе биде пронајден од страна на тимот ОФКАТ и се уште верува дека повторно ќе го види и ќе стави крај на овој кошмар кој го живее веќе 14 дена.
Вообичаено потрагата по исчезнати лица во море во Грција трае до 72 часа, но откако се мобилизираа и македонски волонтери, потрагата е продолжена. (Р.Н.)