Во вооружениот инцидент што се случи вчера во тетовското село Мала Речица убиен е Неип Реџепи од огранокот на ДУИ во Куманово, а досега се приведени четири лица кои учествувале во престрелката.
Меѓу повредените лица, според очевидци е и братот на Неип, Сабри Реџепи кој наводно се здобил со лесна повреда на ногата, јави дописникот на МИА.
Основното јавно обвинителство Тетово синоќа соопшти дека во Мала Речица, во меѓусебна престрелка меѓу две групи животот го загуби едно лице, а неколкумина се повредени.
„Во организирана акција на Обвинителството и Министерството за внатрешни работи, две лица учесници во престрелката кои со возило се упатиле кон Скопје се лишени од слобода. Од страна на надлежен јавен обвинител од Основното јавно обвинителство Тетово синоќа е извршен увид на самото место заедно со екипа на Министерството за внатрешни работи. Јавниот обвинител издаде наредби за обезбедување и прибирање на траги од лице место кои ќе бидат вештачени. Издадена е и наредба за анализа на ДНК профили, за обдукција на починатото лице, како и за земање на парафински ракавици. Основното јавно обвинителство Тетово продолжува во континуитет се до целосно расветлување на настанот“ се наведува во соопштението на тетовското Основно јавно обвинителство.
Од СВР Тетово за МИА изјавија дека во текот на ноќта приведени се уште две лица кои се сомничат дека биле дел од групата која учествувала во претстрелката.
Во Клиничка болница Тетово биле донесени две лица со прострелни рани,од кои едното починало.
МВР денеска на прес-конференција се очекува да соопшти повеќе детали во врска со инцидентот во Мала Речица.
Престрелката се случи во близина на „Шпар маркет“ во Мала Речица. Неколку часа по инцидентот со соопштение се огласија од партијата на Ахмети.
„Ние како политичка партија немаме и не можеме да имаме одговорност за евентуалните инциденти кои не се поврзани со Демократската Унија за Интеграција“, пишува во соопштението на ДУИ.