Околу 200 луѓе се собраа вечерва да му дадат поддршка на турскиот претседател Ердоган. Собирот е на плошадот „Фипип Втори“на влезот во Старата Скопска чаршија и е во организацијата на Сојузот на турски невладини организации “Матусутеб”, јавува новинарката на НОВА Кристина Озимец.
Во моментот се пеат песни за поддршка на турскиот претседател Ердоган, се слуша турска музика, на платото се поставени слики од Ердоган. Собирот е мирен, а граѓаните велат дека се дојдени да изразат поддршка на демократијата во Турција и дека го поддржуваат турскиот народ. Најавено е да зборуваат двајца министри без ресор, Неджет Мустафа и Фукан Цако, турскиот амбасадор во Македонија, како и претседателот на Сојузот на турските невладини организации “Матусутеб”, Таксин Ибрахим. На Собирот присуствува и Имер Селмани, поранешен претседател на Нова Демократија, екс вицепремиер и министер за здравство. Присутните извикуваат „Господ е еден“и пеат турски песни.
