Обвинителката Ивана Трајчева повеќе од еден час изведува материјални докази во случајот „Софтвери“ во кој е обвинет поранешниот генерален секретар на Владата Драги Рашковски. Трајчева презентира СМС пораки кои Рашковски ги разменувал со другите инволвирани во овој судски предмет, а кои се добиени од вештачењето на нивните телефони.
Засега, додека Трајчева ги изведува доказите, нема реакција од одбраната, но Рашковски за овие пораки и за обвинителниот акт на претходните рочишта изјави дека „обвинителството прави филм каков што ни Холивуд не може да режира“.
„Не може обвинителството да кажува и да импутира дека тоа се пораки, за кои што и самиот производител вели дека не може да утврди за каков тип на податок станува збор. Од тоа што јас можам да го кажам е дека ќе имаме едно навистина интересно судење во македонското правосудство, особено во делот на компјутерската форензика“, изјави Рашковски на претходните рочишта.
Рашковски е обвинет дека помогнат од двајца надворешни соработници, спровел незаконски јавни набавки. Според обвинителството Рашковски не ги извршил своите службени должности при спроведување на четири постапки за јавна набавка за Систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на специјални камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици.
Обвинети се шестмина, освен поради незаконски набавки, тие се сомничат и за перење пари. Судењето ќе продолжиу по получасовна пауза. (С.М.)