Вработените од Државната комисија за одлучување во втор степен во областа на инспекцискиот надзор и прекршочната постапка денеска преку соопштение до медиумите информираат дека од март не добиле плата, а целокупната работа и функционирање на Државната комисија е во комплетен застој, со што се засегнати и граѓаните на Република Македонија чии постапки се водат по жалба пред оваа институција.
Во писмото истакнуваат дека состојбата во која се наоѓаат е по разрешувањето на Претседателот и членовите од претходниот состав на Државната комисија на 19 март 2018 година од Собранието на РМ, по што не е именуван нов состав.
Вработените наведуваат и дека немаат хартија за работење, принтерите и фотокопирите се запечатени, немаат вода за пиење, средства за чистење, дел од климите не функционираат, тоалетите се расипани, а во прилог на писмото испратија и неколку фотографии со кои ја илустрираат моменталната состојба.
-Државната комисија нема платено струја 6 месеци. Прашање на време е кога ЕВН ќе ја исклучи и струјата во институцијава. Нема платено сметки за Интернет, сметки за одржување на хигиената. Телефоните се исклучени исто така поради неплатени сметки. Со еден збор Комисијата не функционира, стои во писмото.
Тие велат дека за проблемот во три наврати се обрати до Собранието на Република Македонија и до Владата.
Од Собранието добиле одговор да чекаа избор на нови членови на собраниска седница.
-Таа собраниска седница и тој избор на нови членови и раководство го чекаме веќе 6 месеци, велат вработените.
Тие објаснуваат дека во Државната комисија има вкупно 28 вработени – стручна служба од 24 административни службеници и 4 работници распоредени во 3 сектори.
Поголем дел од вработените секојдневно патуваат од Гостивар, Кочани, Тетово, Куманово, Илинден и како што велат веќе не се во можност да го финансираме својот превоз до Скопје и назад.
-Сите вработени имаат кредитни обврски спрема банките и застој во исплата на платата веќе пет месеци, а можеби тоа ќе трае и повеќе месеци доколку Собранието не преземе мерки за избор на ново раководство. Ова се одразува врз нашата економска состојба, од причина што со неисплатената плата има и неисплатена рата/рати за кои банките дополнително пресметуваат затезна камата. Исто така и здравственото осигурување за сите вработени во Државната комисија истече на 30.04.2018 година и со тоа од 01.05.2018 година не може да се оствари правото на лекување и земање на лекови од аптеките на сметка на Фондот за здравствено осигурување, што предизвикува дополнителен трошок и проблем за сите вработени. Или поедноставно кажано: Немаме пари да си ги платиме домашните сметки, се наведува во писмото до медиумите.
Исто така посочуваат дека во стручната служба има неколку бремени жени, кои треба да се породат во септември/октомври, а немаат здравствено осигурување, како и болни лица, чија состојба секојдневно се влошува бидејќи немаат пари да ги купат лековите приватно.