Во февруарските земјотреси со епицентар во провинцијата Кахраманмарас, во Турција загинаа 505 медицински лица. Оваа информација ја објави министерот за здравство на Турција Фахретин Коџа на својата страница на Твитер, јавува агенцијата Анадолија.
Министерот потсети дека 14 март секоја година во Турција се слави како Ден на здравствените работници, но оваа година датумот остана во сенка на последиците од катастрофата на југот и југоистокот од земјата.
„Овој 14 март не го дочекуваме како историски датум. Во жалост сме. Како последица на земјотресите загинаа 505 наши колеги од зоната на катастрофата. Вкупниот број на жртви надмина 48.000 луѓе. Изразувам сочувство до целиот народ. Севишниот повторно да ја заштити нашата земја од ваква тага. Оваа година 14 март е денот кога заедно со народот ги лечиме нашите рани и од загубата на медицинските лица“, напиша Коџа на Твитер.