Многу граѓани се измамени и купуваат возила со поминати 400 000 до 500 000 километри а на бројчаникот им пишува 100 до 120.000 изминати километри, вели во интервју за Фактор Даниел Воиновски, директор на „Пежо“ во Македонија. Тој смета дека трговците ги мамат и граѓаните и државата.
-Тешки моменти допрва престојат во повеќето земји во ЕУ и според мене не се ниту навестува заминување на економската криза од Европа. Очекувам пад и во втората половина од годинава, исто како и следната година и таа по неа.
Но она што повеќе ме загрижува е домашниот пазар за чие закрепнување мора да се превземат итни мерки за стимулација на продажбата на нови возила. Моментално се стимулира увозот на половни возила, што сметам дека не е во ред, затоа што ниедна економија не добила бенефит од тоа, туку напротив сите гледаат да се ослободат од баластот на половните возила и ги извезуваат што е можно подалеку од себе.
Тоа е така поради повеќе причини како што се загадувањето, безбедноста која е загрозена и трошоците за лекување и осигурување кои се во директна корелација со годините на старост поради зголемениот број на сообраќајни несреќи, вели Даниел Воиновски за Фактор.