Градочалникот на Зрењанин и командант на градскиот штаб за вонредна состојба Иван Бошњак прогласи вонредна состојба на територијата на градот.
Војската на Србија се вклучи денеска во акцијата за деблокада на патниот правец Зрењанин – Белград откако снежните наноси и силниот ветар ги завееја луѓето и возилата во Војводина.
Најкритично е парниот правец Перлаз – Стајачево каде веќе е упатена механизацијата на инженерскиот батаљон, наведува Војската на Србија во соопштение објавено на нивниот сајт.
Центар на копнената војска за обука испрати санитарно возило во селото Кличевац кај Велика Градишка, каде има невреме, се додава во соопштението.
Над десетина луѓе од синоќа се завеани на патот Зрењанин – Белград на потегот Перлаз – Стајачево, каде снежните наноси се во висина од 4 метри, а ветрот достигнува брзина од над 100 километри на час.
Сообраќајот е запрен синоќа околу 21 часот, кога два шлепери се попречија на патот поради орканските ветрови.
Горан Николиќ од Секторот за вонредни состојби за Б92 потврдил дека од синоќа на патот кон Стајачево се блокирани 50 возила. Тој рекол дека не знае колку точно луѓе останале завеани во своите автомобили, зашто синоќа биле евакуирани 40 ученици, неколку жени и стари лица, кои биле сместени на топло.
Според Николиќ спасувањето се одвива бавно зашто временските услови се лоши. Утрово бил направен обид за спасување на еден брачен пар чие возило останало без гориво, исто така еден маж чие возило останало без гориво бил премрзнат и веднаш бил префрлен во Итната медицинска помош.