На периферијата на Суботица утрово дошло до вооружена пресметка меѓу мигранти и според првичните информации, едно лице им подлегнало на повредите, а седуммина се повредени, јави дописникот на МИА од Белград.

Меѓу повредените мигранти, кои се згрижени во болницата во Суботица, има и 16-годишно девојче чиј живот е во животна опасност.

До судирот меѓу двете ривалски групи на мигранти дошло, најверојатно, поради расправија кој ќе ги шверцува мигрантите преку блиската српско-унгараска граница.

Најмалку 15 возила на жандармеријата и полицијата се излезени на терен. Полицијата ги блокирала приодите до шумата каде се случила пресметката, а на местото на конфликтот е пристигнат и министерот на внатрешни работи, Александар Вулин.

Градоначалникот на Суботица, Стеван Бакиќ по повод инцидентот изјави дека локалното население со овој настан не е загрозено и дека не е загрижен за безбедноста на жителите на Суботица, но додаде дека безбедноста на граѓаните на Суботица ќе се подигне на повисоко ниво по овој конфликт.

Како што објасни Мирсад Налиќ, претседател на Советот на месната заедница Маково во Суботица, конфликтот меѓу мигрантите, Авганистанци и Пакистанци се случил околу седум часот наутро во блиската шума.

„Овде со денови од утро до вечер минуваат такси возила со сомборски регистерски таблички и ги носат во шума. Полицијата ги враќа назад, но по еден час се враќаат. Сè уште не се знае точно што се случило во шумата, полицијата е на терен и сите пофалби за нивната работа, изјави Налиќ, пренесува порталот subotica.com.