Вработените од металуршкиот комбинат „Југохром“ од Јагуновце денеска ќе излезат на протест и од од 12 до 13 часот ќе ја блокираат крстосницата пред Судската палата во Скопје.
Како што најавија ќе достават и протестно писмо до Инспекторатот на Министерството за животна средина за да се повлече мерката за забрана за работа на Комбинатот од каде егзистенција обезбедуваат неколку илјади жители на овој регион.
Во него се содржани барањата од пред 10 дена, кога тие го блокираа автопатот Тетово – Скопје. Тогаш побараа повлекување на одлуката на Инспекторатот за животна средина за исклучување на печките на „Југохром“. Исто така, добивање статус на работниците додека не се рестартира фабриката, а побараа и од раководството да забрза со изградбата на филтер-станицата која успори поради „оддолжување на постапката за градежна дозвола“.
– Југохром“ не работи дваесетина дена, а печките беа исклучени бидејќи не беа монтирани филтрите за заштита на животната средина.За комбинатот ова беше краток рок, а и во услови кога компанијата не работи мерните станици во Тетово воздухот е загаден, велат вработените.
Некои медиумите објавија дека затворањето на комбинатот би траело само три месеци. Претходно, „Југохром“ бараше ново 18-месечно продолжување на законскиот рок и договорот да постави филтри за отпрашување, иако Владата и Министерството за животна средина на неколку пати за неколку години овозможија овој рок да биде „прескокнат“.
Југохром на почетокот на месец ноември ги изгасна печките за топење руда, откако инспекцијата од Министерството за животна средина утврди дека не е исполнет условот – до крајот на октомври да проработат филтрите за контрола на издувните гасови.
Во јануари и февруари годинава Југохром не работеше со одлука на раководството со цел да не се намали влијанието врз загадувањето на воздухот.