„Незнам кога ми беше поголема радоста. Кога го примав томосот за автономија на Православната охридска архиепископија од рацете на блажениот патријарх Павле, или денес кога се воспоставува потполно литургиско општење со сите архиереји на Македонската православна црква – Охридска архиепископија. Ако смеам да избирам би дал предност на денешната радост“, рече денеска архиепископот охридски и митрополит скопски Јован Вранишковски, на денешната заедничка литургија меѓу ПМЦ-ОА и СПЦ.
Вранишковски му се заблагодари на архиепископот Стефан, како што рече на „подготвеноста за лична жртва, да ги поднесе озборувањата на нецрквените луѓе во Северна Македонија“.
Најавувајќи го настапот на Вранишковски, патријархот Порфириј рече: „Сега сакам да му дадам збор на вам сите познатиот Јован да ви упати неколку зборови“.
Вранишковски во својата беседа им оддаде големо признание и почит на архиереите од Македонската православна црква, на чело со архимандрит Стефан, кои претрпеа, рече, неразумен и антицрковен притисок на јавноста во Република Северна Македонија.
„Треба да им се оддаде голема почит и благодарност на архиереите на МПЦ на чело со архиепископот Стефан кои ги издржаа сите неразумни противцрквени притисоци од јавноста во Република Северна Македонија. Велам противцрквени притисоци бидејќи тие луѓе не се интересираа за канонско и црквено решавање на долгогодишниот проблем, туку повеќе ги интересираа националните, реалполитичките, геополитичките состојби“, рече Вранишковски.
„Во оваа прилика би се заблагодарил на архиереите на православната Охридска архиепископија, чесното свештенство, од кои некои дојдоа од Република Северна Македонија само за оваа прилика, на преподобното монаштво, и особено на верниот народ кој со години црковно служеше во приватни куќи, станови и подруми кои беа богослужбена места на православна Охридска архиепископија. Тие издржаа не само тешки услови за богослужење, туку и тешки услови за постоење, под закани за прогон и затворање, но кога е тоа жртва за единство на Црквата, тие со радост го издржаа. Затоа не можам денес да не им се заблагодарам бидејќи токму поради таа нивна 22 годишна жртва ние денес стигнавме до нашето единство“, рече Вранишковски. (С.К.)