Поголем дел од земјава изутринава е под снежни врнежи кои се поинтензивни на југозападот. Најмногу снег ноќеска наврна во Пожаране каде што е формирана снежна покривка од 36 сантиметри, во Маврово – 33 см., во Дебар – 22 см., во Битола – 21 см., во Охрид – 19 см., во Прилеп – 15 см., во Попова Шапка – 9 см. и во Тетово – 6 см.
Во пониските предели врне дожд, а во текот на ноќта дуваше и умерен до засилен северен ветер, кој достигнуваше брзина од 80 до 100 км. на час.
Облачно, студено и ветровито време со повремени врнежи, претежно од снег, нè очекува и во текот на денешниот ден. Во планинските региони и во западните делови дополнително ќе се зголеми снежната покривка, а долж Повардарието врнежите ќе бидат воглавно од дожд. Силниот ветер кој ќе продолжи да дува и денеска (и над 80 км/час), ќе создаде услови за појава на снежни наноси.
Максималната температура ќе биде во интервал од 0 до 8 степени. Во Скопје облачно, студено и ветровито со повремени врнежи од дожд и снег. Максималната температура ќе достигне 5 степени.