На парламентарните, покраински и локални избори во Србија победи Српската напредна партија предводена од претседателот Александар Вучиќ. Според неофицијалните резултати СНС освоила 62, 5 проценти гласови
Според првичните податоци на Републичката изборна комисија на денешните парламентарни, покраински и локални избори во Србија Српската напредна партија предводена од Александар Вучиќ го освоила мнозинството гласови односно 62,5 проценти од гласовите. По неа следуваат коалицијата СПС-Обединета Србија со 10,7 проценти и партијата СПАС со 4 проценти освоени гласови.
Од 76 проценти обработени гласови, Српската радикална партија добила 2,2 проценти од гласовите, ПОКС 2,8 проценти, а коалицијата „Метла “ 2,4 проценти.
Републичката изборна комисија соопшти дека излезноста изнесува 50,2 отсто. Според невладините набљудувачки организации ЦРТА, ИПСОС и Цесид, излезноста е помала од парламентарни избори во 2016 година.
Невладината набљудувачка организација Црта информираше дека се забележани 0,5 отсто неправилности на избирачките места, како што е случајот со таканаречениот „бугарски воз“ на две изборни места во Зрењанин и на едно место во Пожаревац, тепачка на избирачкото место во Нов Белград поради бремена жена, обидот за контрола на избирачкиот список од неовластени лица во Свилајнац и напад врз новинарите на нишкиот портал Јужни вести, од лица кои биле снимени со непознати списоци во рацете.




