Досегашниот премиер, а сега претседател на Србија, Александар Вучиќ, вели неговата победа на вчерашните претседателските избори е „чиста како солза“ и само се покажало во која насока Србија сакаат да се движат, односно како што вели Вучиќ, тие се изјасниле за реформски процес.
Вучиќ потенцира дека зад него стојат повеќе од два милиони гласачи, кои учествувале на изборите и дека добил 12 отсто повеќе гласови од сите други кандидати заедно.
– Горд сум што добив огромен број гласови во услови кои за нас не беше лесно, за нас ова е важен ден, изјави Вучиќ од седиштето на неговата партија СНС.
– Кога ќе се додадат и оние кои не се директно против, огромното мнозинство во Србија се за продолжување на процесот, да продолжиме по европскиот пат, да се одржи традиционалното пријателство со Русија и Кина, рече Вучиќ меѓу другото во својот говор.
Тој вели драго му е што победил уште во првиот круг со тешка и напорна работа.
– Ова значи дека луѓето го разбрале она што го правиме, иако знаеле како е да се живее со вакви проблеми кои народот се соочува. Многу е важно што граѓаните јасно ставија до знаење дека сакаат да се движат напред, побрзо, подобро, посилно, и тие сакаат проблемите што побрзо да се решат. Ние треба да веруваме дека можеме да постигнеме добри резултати, а не тоа да биде прашање дали некој ќе направи одредена комбинација, рече Вучиќ.
Новата влада, како што најави тој, ќе се формира за околу два месеца, а несомнено е дека за премиер ќе постави негов близок човек.
Вучиќ воедно, по победата му се заблагодари и на претседателот Томислав Николиќ со кој доаѓаат од иста партија.
Според резултатите од РИК од преброени 91,65 отсто од гласовите, Вучиќ освоил 55,13 проценти, Саша Јанковиќ 16,25, Лука Максимовиќ 9,43, Вук Јеремиќ 5,64 и Војислав Шешељ 4,47 од гласовите.
Останатите кандидати заедно освоиле 7,41 проценти од гласовите. Излезноста била 54,55 отсто.