Братислав Гашиќ, министер за одбрана на Србија
Премиерот на Србија, Александар Вучиќ најави дека досегашнот министер за одбрана, Братислав Гашиќ нема да остане на својата функција поради изјавата која ја објавија српските медиуми дека „сака новинарки кои лесно клекнуваат“.
– Кога слушнав што се случи, бев изненаден и шокиран. Тоа се работи кои не смеат да се случат никому, или не треба да се случат, изјави Вучиќ.
Тој вели, иако постојано бил во одбрана на своите министри, и ги штител од напади и обвинувања, за изјавата на Гашиќ, не можел да најде оправдување иако самиот тој се извинил.
– Извинувањето не е доволно. Мораме да ги заштитиме сите жени во Србија, тоа беше лоша порака за сите жени и кога станав премиер реков дека земјата ќе биде модерна и пристојна. Тоа е земја во која не се навредуваат жени, во која нема мачоизам и сексистички навреди, надополни српскиот премиер.
Министерот за одбрана Братислав Гашиќ спорната изјава дека „сака новинарки кои лесно клекнуваат“ ја даде во неделата во Трстеник по посетата на една фабрика, непосредно пред да се обрати пред српските медиуми кои се подготвуваа да земат изјава.