Краткометражната стоп анимација „Алерик” на Вук Митевски својата светска премиера ќе ја има на претстојниот Сараевски филмски фестивал.
„Алерик” е примен во официјалната натпреварувачка програма во кој со уште девет кратки филма ќе се бори за “Срцето на Сараево” во оваа конкуренција- влезе во изборот од десет филма во конкуренција од пријавени 400 краткометражни филмови.
Ова е второ учество на Сараевскиот филмски фестивал за Вук Митевски кој со својата краткометражна анимација „Ангел” учествуваше во програмата за анимација која сега е споена во категоријата краткометражни филмови.
„Алерик” е цртана и глинена стоп анимација, по сценарио на Теона Стругар Митевска, која ја раскажува приказната за „Алерик”, младо момче кое живее со својот дедо. Кога војната ќе ги стигне и ќе го разурне нивниот свет, Алерик останува сам и завршува на военото поле.
Бојното поле е место каде што се изумира, каде што емоциите престануваат, каде имагинацијата се меша со реалноста и каде што момчето станува лик од своите сништа.
„Алерик” е македонско- германска копродукција а е реализиран со финансиска поддршка од Роберт Бош Фондацијата и од Македонскиот филмски фонд.
Продукцијата Сестри и брат Митевски на годинешниот Сараевски фестивал ќе учествува и на копродуцентскиот маркет Синелинк плус каде што е избран новиот проект на Теона Стругар Митевска „Апартман”.