Претседателот на грчкиот парламент Никос Вуцис смета дека заемно прифатливо решение за името, заведено во Уставот и за севкупна употреба, е во интерес на Грција.
Како што јавува МИА, Вуцис во својот говор по повод промоцијата на книгата „10+1 прашања и одговори за македонското прашање“, во просториите на Стопанската комора во Атина, се задржал на шест точки изразувајќи ги неговите расмислувања во однос на прашањето за името.
„Во интерес на нашата земја е да се реши прашањето врз база на заедничко и заемно прифатено решение за севкупна употреба, со уставна регистрација на името и со еден широк договор што ќе потврдува, ќе гарантира и ќе охрабрува една нова ера во односите на народите, не само во економијата, туку и во сите прашања што ги засегаат“, рече Вуцис.
Претседателот на грчкиот Парламент смета дека изнаоѓањето решение е важно не само за Скопје туку и за Атина, но од различни причини. Тој додава дека сега веќе на сите им е јасно дека беше изгубено драгоцено време во минатото.
„На почетокот, грчката страна не работеше на сложено име, а подоцна, тогашната власт во ПЈРМ започна со постапки со јасна националистичка димензија што упорно имаа за цел регистрирање на името на земјата како Македонија“, истакна претседателот на Парламентот на Грција.
Никос Вуцис изразува убеденост дека доколку решението е во рамките на грчките позиции, тогаш ќе биде поддржано од мнозинството политички сили во грчкиот Парламент.
„Мојата политичка проценка е дека доколку во Парламентот дојде за ратификација договор врз основа на повторените јавни ставови и обврзувања од страна на премиерот, но и од министерот за надворешни работи, ќе се најде, преку расправа, една широка политичка поддршка“, смета претседателот на грчкиот парламент, пренесува МИА.
Позициите на официјална Атина ги повтори и алтернативниот министер за надворешни работи на Грција, Јоргос Катругалос, во интервју за за грчката телевизија Скај.
Според Катругалос прозорецот на можност е отворен, но додава оти топката е на страната на соседната земја, и ако излезе во пресрет ќе има договор.
„Сакаме комплетно решение за да не се создаде одново проблем во следната деценија и сакаме решение што ќе има карактеристика на трајност и затоа е потребна промена на Уставот. Доколку другата страна се одзве на ова, ќе имаме договор, ако не, нема да имаме. Топката, јасно дека е на нејзина страна“, вели Катругалос.
Тој коментира дека не станува збор за лесни преговорите, тоа е нешто што го знаеле уште од почеток, а изрази надеж дека на крај ќе се постигне договор.
„Постои напредок, не постои слика дека стигнуваме до ѕид и дека за она што го предлагаме не се разговара. Постојат разговори, во доста точки остануваат на почетните позиции, во други точки се поместуваат. Се надеваме дека на крај ќе можеме да имаме еден взаемно корисен договор“, рече Катругалос
Во меѓувреме дел од грчките медиуми пишуваат дека на 25 април ќе се одржи нова средба во Виена на шефовите на дипломатиите на Македонија и на Грција, Никола Димитров и Никос Коѕијас со медијаторот Метју Нимиц.
Датумот се споменува во новинарските кругови во Грција, но засега нема ниту официјална потврда, ниту демант.
Грчкиот информативен портал Ин, пишува дека новата средба се планира под голема тајност, но индиректно ја поврзува и со изјавата на Коѕијас за радиото 247 дека не може да се постигне договор до јулскиот НАТО Самит.
„Многу веројатно е новите разговори да се однесуваат на временскиот период, нешто што се спомена и по средбата во Охрид“, пишува Ин.