Утревечер, во Млaдинскиот културен центар, со почеток во 20 часот ќе се одржи настанот „Жена и пол“ чија цел е јавно да ги преиспита социо-психолошките релации во патријархалното хетеросексуално семејство и традиционално општество кои се однесуваат на полова и родова дискриминација, хиерархиски, родово асиметрични, експлоатaторски односи, мизогинизам, како и сите останати скриени форми на репресија поврзани со женското прашање.
Настанот е конципиран од Ивана Васева, Филип Јовановски и Јованка Попова, а учество ќе земат Искра Гешоска (теоретичарка на културата), Зорица Димовска (претставничка од иницијативата АМАН), Ивана Драгшиќ (активистка), Хелена Роза (новинарка), Драгица Русковска (учесничка во НОБ), Билјана Секуловска (новинарка), Ана Франговска (кураторка).
Кому сè, имајќи ги предвид инструментализираните позиции на моќ во ова општество, „треба“ да му се „исповеда“, односно – дава отчет, современата жена.
Седум кратки монолози во форма на лични „исповеди“ кои во контекст на просторната инсталација (сценски импровизирана кабина – исповедалница) се полу-интимни и полу-јавни, овозможуваат „препознавање“ и јавно изговарање, од избрани припаднички на женската популација, на проблеми поврзани со машката доминација, потиснатоста на жената без право на глас, патријархалната традиција, а особено за потчинетост кон „авторитетот“ – препознаен како олицетворение на црквата, нацијата, мажот-татко во традиционалното семејство, или мажот-претпоставен на работното место.