Играта Покемон ГОУ (Pokemon GO), која стана глобален хит, засенувајќи некои од најпопуларните апликации на мобилните телефони, денеска е пуштена во употреба и во Велика Британија. Досега играта беше достапна во САД, Австралија и Германија.
Оваа иновација досега и донесе заработка од неколку милиони долари на јапонската компанија „Нинтендо“.
Како се игра
Преку апликацијата, играчите следат реални мапи користејќи ја GPS локацијата на телефонот и на различни места во местата каде што се движат ги фаќаат покемоните и ги тренираат за битка.
Секој покемон кој ќе заврши во телефонот на оној кој го фатил може да го користи во битка со друг играч или во виртуелна борба.
Креаторите на играта Ниантик и Покемон компанијата ги отфрлаат сите искази на загриженост за приватноста на играчите и велат, целта на играта е едноставно луѓето “да си поминат фантастично“.
Интересни факти за Ловците на покемони низ светот
– Жена во Америка пронашла труп на починат додека барала еден од своите покемони близу река која пак била близу нејзиниот дом. Го пријавила случајот во полиција, со што им помогнала на службите.
– Четворица кои ја користеле играта за да ги наведат играчите на изолирани места, се уапсени бидејќи го правеле тоа со цел да ги ограбат. Поради ова се огласија и креаторите на играта кои порачаа дека играчите треба да бидат претпазливи и да играат со луѓе кои ги познаваат.
– Играта за малку ќе ја земеше и првата жртва во Њујорк во вторникот, кога возач на автомобил скршнал од патот по кој возел обидувајќи се да фати покемон по што удрил во дрво.
– Низ светот медиумите постојано пишуваат и за други случаи кога луѓе се повредиле за време на играта бидејќи не внимавале на реалноста пред себе додека ја следеле мапата по која ловат.
Нинтендо на големо се потпира на своите игри. Најпопуларната нивна игра, култната Супер Марио е последната која им донела голема заработка, и често беа критикувани поради некреативноста на пазарот во време кога технологијата со смартфоните постојано се развива.
Сепак, по оваа идеја, акциите на Нинтендо значајно пораснаа со што сегашната вредност на Нинтендо е 34 милијарди долари, што е за нешто над 50 отсто пораст на вредноста по објавувањето на играта.