Угостителските објекти кои ќе примаат невакцинирани гости ќе се соочат со глоби во износ меѓу 250 и 30.000 евра, појаснуваат од ДПИ
В понеделник, 16 август, почнуваат да важат новите мерки против ширење на ковид-19, според кои за некој да влезе во угостителски објект или да учествува на настан од било која природа кој вклучува над 30 учесници, ќе мора да има потврда за извршена имунизација, барем со една доза. Угостителите и сопствениците на објектите каде се организираат настани, мора да располагаат со редарска служба која ќе ја контролира потврдата за имунизација на секој кој планира да влезе.
Ако граѓанинот не располага со сертификат за имунизација, ризикува да биде казнет според Кривичниот законик и според Законот за заштита на населението од заразни болести, што е во делот на МВР, велат од ДПИ.
Угостителските објекти кои ќе примаат невакцинирани гости ќе се соочат со глоби во износ меѓу 250 и 30.000 евра, појаснуваат од Државниот пазарен инспекторат во изјава за Канал 5, но не ги откриваат начините како ќе ги проверуваат рестораните и другите објекти.
– Не мора да значи дека секогаш треба да има припадници од МВР при контролите, но начинот на кој ние ќе контролираме засега останува во тајност, затоа постојат и редари. Согласно Законот за заштита на населението од заразни болести, во членот 66 и 66 а и б, глобите изнесуваат од 250 евра до 30.000 евра, зависно дали трговецот е во мал или голем угостителскиот објект, а за физички лица казната е 250 евра – велат од ДПИ.
Веднаш по одлуката на владата почнаа и реакции од угостителите. Од Независната угостителска комора (НУК) побараа да се укине оваа одлука, а Здравко Јосифовски најави дека прв ќе го затвори локалот додека се применува оваа одлука.
(Љ.Б.)